نهفات عيلتنا - الـــبــــ(✍🏻) ـــــارت [ 2️⃣ - مكتملة | روايتك

_*البارت الثاني*_ 🔵🔵🔵🔵🔵🔵🔵🔵🔵🔵🔵🟣🟣🟣🟣🟣🟣🟣🟣🟣🟣🟣 •• حكيت خلص لهون و بس بدي اعوض المهزلة اللي تعرضتلها .. صرت اعيط و احكي دم دم و عملت حالي دخت و وقعت عالارض .. البنات صاروا يصرخوا .. احمد ترك التلفون و ركض عليي .. و امي بتخبط فيي كفوف .. حط ايد تحت راسي و ايد تحت رجليي و حملني و حطوني عالكنباية .. طبعا هالكم ثانية تمنيت ما يخلصوا .. كان خايف عليي كتير .. بعد ما صحيت على اساس اني مغيبة كنت .. بلشت عياط و اجوح و انوح وينك يا خالو هيثم لو كنت هون كنت عالجتني .. نسيت احكيلكم انه خالي الصغير دكتور بشتغل بالرياض و هو اقرب عمر للشباب .. يعني ما حدا فيهم بحكوله خالو او عمو .. المهم احمد بحكيلي لو كان هون كان رفعلك رجليكي عمخدة ما احنا حافظينها .. لا يا شاطر هاي في حالة هبوط الضغط انا معي تحسس من البصل .. لازم اروح عامريكا عشان اتعالج .. اكيد هون ما عنا علاج لهيك اشي .. عامريكا قلتيلي .. مفكرتيني مش فاهم عليكي .. ضحك ضحكته المعتادة و هزة راسه اللي ما حدا بفهمها غيري .. حكالي بصوت واطي بوشوش فيي : اوعي تحكي لحبيبك بلاش يبطل يتجوزك و تعنسي و تقعدي بوجهنا ما صدقنا و حدا يقبل فيكي عصاية طقي ههههه .. انا عصاية طقي ماشي يا احمد .. بس مش مشكلة يلا المهم اني هربت من المطبخ و نجحت بالتمثيل و حطوا العشا بلاش احكيلكم كم العدد اللي كان بس لحالكم تخيلوا .. انا بما اني مليش عالاكل ضليت متمددة و ما قمت .. ما بشوف الا احمد جايب لقمة و حطها بتمي بسرعة و رجع يقعد عالسفرة .. الله ستر ما شافه بابا .. خلصت السهرة بسلام و رجعنا عبيوتنا .. امي من يومها كان وضعها مش عاجبني .. كانت كل ما تشم اشي تستفرع بعيد عنكو .. و بطلت قادرة تشتغل بالبيت ولا تطبخ .. امي طبعا يادوب عمرها 40 سنة لانها تجوزت صغيرة و خلفتني على طول .. بلشت ادخل المطبخ و اتعلم قد ما اقدر .. كنت احكيلها روحي عالدكتور تعالجي اعملي تنظير لمعدتك تحكيلي لا عادي فش فيي اشي بجوز برد .. و بابا علاقته فيها شوي خفت حسيت كانه في مشكلة او خلاف صاير بينهم .. و صار يتدايق من جمعاتنا كل اسبوع .. و يحكي عن خالاتي انهن سبب في اللي عمتله بحالها .. انا و خواتي مش فاهمين اشي طبعا .. كنا بس نسمع .. بيوم كنت قاعدة بالجامعة و متدايقة مبين انه صاير اشي .. قعدت جنبي آيات بتحكيلي ولك شو قصتك متغيرة و مبطلة زي زمان .. حكتلها ولا اشي بس متدايقة .. اقترحت عليي اجي عندهم بعد الجامعة .. رنيت عماما حكتلي روحي بس ابوكي برجعك اوعي ترجعي مع حدا .. استغربت من كلمتها بس ما فرقت معي المهم اروح .. وصلنا عند بيت خالتي كانت الساعة قريب ال5 مساءا .. احمد ما كان مروح من شغله لسا .. ما رضيت اكل حكيت بتغدى معه بس يرجع .. قعدت معي خالتي بتقلي كيف امك صارت احسن .. حكتلها لا و الله لسا بحسها تعبانة كتير بقلها تفحص او تعمل تنظير للمعدة .. حكتلي شو دخل المعدة مهو هاد وحام ليش ما بتعرفو انها حامل .. انا صرت الطم شو حامل .. لقيت تفسير لكل الاشي اللي بصير و تصرفات بابا لانه كان حالف عليها ما تخلف و ما بده ولد و لا فارقة معه .. بس الكل بحكيلها جيبي و بعدك صغيرة و من هالحكي و بكرا بتجوز عليكي و انتي بتضحكي و تلعبي .. صارت الساعة 7 و لسا احمد ما رجع عالبيت و انا حسيت حالي تأخرت و ماما بتقلي يلا ابوكي جاي بالطريق .. خالتي بتحكيلها خلص هي احمد و ايات بوصلوها تخافيش .. و ابدا امي عندت الا اروح هلا .. وصل بابا و رجعت عالبيت بدون ما اشوفه و ضليت على لحم بطني اتلوى طول الليل من الجوع .. اول مرة بحس انه الاكل مهم .. بس نام الجميع تسللت عالمطبخ و غطست جوا التلاجة لحست بواقي الأشياء .. اخر اشي شربت كاسة عصير و قبل ما اطلع لمحت حدا واقف التمست طلع بابا مفكر في حرامي ههههه و كان ماسك عصاية القشاطة .. و لما تأكد انه انا ضل محافظ على هدوئه مشان اكل براحتي هههه مفكرني كاينة كل يوم هيك بعمل .. اخ يا احمد من وراك صار لقبي مفجوعة الليل .. ما كنت قادرة احكي مع امي بعد ما عرفت الحقيقة و ضليت مستهبلة عشان ما احرجها حكيت اكيد مش ناقصها بكفي بابا واللي بعمله فيها .. هو كان خايف عليها لانه اخر حمل الها صابها ضغط حمل و تعبت كثير بعده صابها اكتئاب عشان طلعت كمان بنت و صرنا 5 .. بحملها هاد و بس صارت بالشهر الخامس و بطنها كبر و بين عليها الحمل خبرت الكل .. و قررت انها ما تعرف شو جنس الجنين .. و ترضى باللي ربنا كتبلها اياه ..مرقوا ست شهور على حمل امي يعني صارت بالشهر التاسع .. خلالهم انا تحولت لبنت من نوع اخر .. صرت ياسمين المعدلة .. و صار المطبخ لعبتي .. ما ضل صفحة او جروب عالفيس بوك بخص المطبخ .. او الاكل .. حتى لو كانت الصورة معلقة او مريول جلي .. المهم اني اشترك فيه .. هلكت بابا طلبات و انا كل جمعة و سبت اعمل اصناف و حلويات اشي يتاكل و اشي ينكب .. اخر اشي بابا حكالي ركزي عالاصناف اللي بنحبها .. حكتله لأ لازم نغير زهقنا من الاكلات التقليدية .. و انا صراحة بحس مودي بالمطبخ الغربي .. يا بابا غربي و لا الضالين آمين بناكل ستيك .. باستا .. بيتزا .. سلطات متنوعة .. بس انسيلي الشرق آسيوي و الجنوب افريقي .. يعني اذا بدك تتشاطري زبطي الفاهيتا المكسيكية .. و بلاش التشاينيز و أشكاله .. خلص تكرم عينك ابو ياسمين .. هالحكي مش مبالغ بس اكيد مقارنة بأي بنت تانية لسا ما وصلت لمستوى العدالة اللي بالكو فيه .. بس بيني وبين حالي كان تركيزي اتعلم الشغلات اللي بحبها احمد .. كانت آيات تعطيني طريقة أي اكلة او نوع حلو بحبه .. و اكثر شي كان يحبه حلو ليالي لبنان .. حكيت خلص لازم اعمله و ادوقه اياه مشان يغير فكرته عني و ابطل بنظره ياسمين اللي ما بتنفع لإشي .. لميت الصبايا بجروب خاص فينا و حكتلهم هيني عملت ليالي لبنان وبدي انزل صورته عالفيس ، بدي اشوف ابداعاتكم بالتعليقات .. و فعلا فش خمس دقايق الا انا منزلة صورة جاط البايركس و مكثرة فستق حلبي و كتبت ( عمايل ايديا و حيات عينيا ) .. و ما شاءالله اكثر من توقعاتي كانت التعليقات .. بدعوا الصبايا .. حسيت تلفوني رح يفقع من كثر الكذب اللي انحكى يومها .. جهنم فتحت ابوابها على وسعهم من ورا لسانتنا .. آيات : ياسمينتي جد انتي اكثر من مبدعة لازم تشتركي ببرنامج ست النكهات على قناة رؤيا اكيد رح تغلبي كل المشتركات سيرين : حبيبة البي يا ياسمين عنجد بشهي بحياتي ما دقت ازكي منه ديمة : مش قادرة اكل اشي تاني مشان ما يروح طعمته من تحت سناني يا ويل البي انا شو فنانة غنى بنت خالي ابو عدي : واااو عنجد وااو لو بعرف اكتب شعر كنت كتبت قصيدة بس رح اعملك شير على كل الجروبات لانه اللي متلك لازم ينشهر حياتي بيان بنت خالي التاني : ما توقعت بحياتي ادوق هيك ابداع ، ضروري ضروري ياسمين تعمليه مرة تانية مشان الكل يدوقه لانه بجد تحفة اما تعليق ريم اللي جاب الحلقة الأخيرة : يسلمو ايديكي جد كان من اروع ما يكون و خصوصا القطر اشي فاخر من الاخر تقولي منال العالم و كان تعليقها سبب في ظهور التعليق اللي حاز على اكثر عدد لايكات ، ألا و هو تعليق نبع الحلال امي ( الله يسامحها ) من كل التعليقات ما اجا عبالها ترد الا على تعليق ريم .. مش عارفة ليش ما عملتلها بلوك قبل ما انزل البوست المشؤوم .. كتبت تحت تعليق ريم : القطر انا عملته خالتو خافت تعمله و ما يزبط معها و مما ادى الى تشجيع البقية .. كملوا من وراها حزب خالاتي و زوجات اخوالي لما كشفوا عن بناتهم انه ولا وحدة طلعت من بيتها .. و الله لا يفرجيكم التموا كل الشباب و بلشو يضحكوا .. و كل واحد يمنشن للثاني .. و كل وحدة فينا تهزأت اكثر من الثانية .. المهم عملنا تعطيل لحساباتنا و اعتزلنا الفيس بوك .. برضو ما خلصنا لحقونا على جروب الواتس .. و كل يوم الشباب يسالوا قصي اذا اخته ديمة اكلت او لاء عشان ما يروح الطعم من تحت سنانها .. بس انا من كل هاد ما بهمني الا القطعة اللي خبيتها لاحمد و حكيت لامي ما حدا ياكلها بدي اخدها معي لصاحبتي بالجامعة .. اخدتها معي و اعطيتها لآيات .. اللي بدورها وصلتها لاحمد .. و حكتله ياسمين بعتتلك اياها .. بنفس اليوم بالليل ببعتلي عالواتس صورة الصحن اول شي و هو مليان و صورة تانية و هو فاضي انه يعني اكله كله و كتبلي يسلمو ايديكي .. حكتله و ايديك بس فش اشي لله .. شو بدك اكتب عالفيس .. لا لا شو فيس و حكي فاضي ، بدي منك خدمة تحرز .. ابشري .. بدي تشوف لابتوبي ما بعرف شو قصته بضل يعلق و بدي انزل عليه برامج جديدة و بما انه تخصصك IT ف حكيت ما الي غير ابن خالتي الغالي احمد .. ولو تكرم عينك كم ياسمين عندي انا .. خلص بكرا بروح من الجامعة عندكم بس دخيل عينك لا تتاخر .. لا بكرا بروح بكير .. طيب ممتاز .. سلام .. و انا بدوري جهزته و ما خليت صورة الا شطبتها .. و فرغته من اي معلومات شخصية و نيمت اللابتوب بحضني هديك الليلة .. و اخدته عالجامعة و روحت انا و آيات عبيتهم .. و بس اجا احمد حكالي هاد بدو شغل بكرا بخلصه و بجيبه معي بما انه الخميس .. حكتله طيب .. يلا كيف بدي اروح عبيتنا هلا .. ولو انا بوصلك تعالي يا آيات معنا .. لا عندي دراسة خلص ياسمين عادي روحي لحالك .. لا بابا بشلني .. ولك شو بدو يعرفه .. احمد ما علق و لا فتح تمه .. ركبنا بالسيارة و اول اشي سألني عنه : شو اخبار حبيب القلب مش ناوية تعرفينا عليه ؟ .. انا غيبت ضحك .. فكرت الموضوع انتهى بس شكله موضوعي بخصه .. يييي بعدك متزكر .. ليش انسى .. عكل حال الحمدلله كويس بس للاسف صعب اعرفه عحدا لانه كتير بغار عليي يا احمد كتير فوق ما تتخيل .. ماشاءالله عليه اوعي تحكيله انك طلعتي معي بالسيارة .. لا شو احكيله صدقني بموتني و بمنعني اطلع من باب البيت حتى عالجامعة بمنعني اروح .. شو عكيفه ؟ .. اااخ يضرب الحب شو بذل يا ابن خالتي شو بدي اعمل ما بقدر على زعله يؤبر ألبي .. سلامة قلبك انا مش قادر افهم مشاعرك لاني لسا ما جربت الحب صراحة .. حكى هالكلمة و اعطاني نظرة مع مدة لسان انه يعني مش فارقة معه انا .. حكيتله اللي بدو يحب بدو يكون قد الحب لانه مش سهل كله تضحيات .. مزبوط و انا من النوع مستحيل اضحي مشان حدا الا امي و ابوي و اولادي بالمستقبل .. طيب و مرتك ؟ .. اذا كنت احبها اكيد بس اذا كانت مشاعري باردة تجاهها لا ما بتفرق معي .. وصلنا الحمدلله عند نهاية هالجملة و اعتذرت منه بقدرش اقلك اتفضل و وصي خالتي تحكي انه طلعت معنا بالسيارة .. توكلي عالله ما بقطع هالرقبة غير اللي زرعها .. طيب سلام .. فتت عالبيت و دمي بدو يفور يا لطيف شو هالرجل الثلجي اللي الله باليني بحبه .. انا لازم انساه .. خلص بدي اعيش بقية حياتي بدون تضحيات يعني بس هو مستخسر يضحي .. حكيت كل الحكي للبنات تفو عليي من ورا هبلي وحكولي لازم تنهي هالمسخرة و تعدلي الاشاعة اللي طلعتيها عحالك اصلا .. من الاول ما كان لازم تحكي هيك .. كلامهم مزبوط ما نمت ليليتها من التفكير .. تاني يوم اجتمعنا و اعطاني اللابتوب .. سالني علاء ليش جهازك مع احمد .. اعطيته يفرمتلي اياه .. و ما لقيتي الا احمد .. ليش شو المشكلة .. خلص انسي و تحكيش اني حكتلك هالحكي .. صراحة كلامه كان غريب بعرفهم كتير صحاب معقول علاء بحبني و بغار عليي من احمد ؟ سألت سيرين حكتلي مستحيل علاء بعتبرك زي اخته هيك دايما بحكيلي .. طيب ليه هيك بحكي .. ما بعرف .. يومها احمد وصاني كتير اني ما انزل عليه صوري بدون حجاب .. و حكالي ديري بالك تفتحي كميرا لحدا .. استغربت كلامه .. طبعا ما رديت عليه و روحت عالبيت رجعت انزل كل شي كان عندي من صور .. وين بدي اروح فيهم ما بحب اخلي عفلاشة .. بعد اسبوع كنت انا و امي عند الدكتورة مشان تفحص .. رنت عليها خالتي منى بتقلها عملت معجنات سبانخ و بدها تروح عبيت سيدي تعطيهم .. حكتلها طيب انا بالمكان الفلاني تعالي خديني .. انا يومها عشان الدنيا ربيع و الجو بديع و لسا ما نزلنا الصيفي .. و بعدني بلبس بلوزة داخلية لانه الجو بحيّر مرة شوب و مرة برد .. لبست جلباب صيفي مو مبطن لونه بيج .. وصلت خالتي ويا حبيبي مين معها .. ركبنا انا و امي من ورا طبعاً هية من جهة خالتي طلعت ، و انا صمدتني ورا احمد .. و نفس البوز اللي ضربه يوم الgloss ضربه اليوم .. تفقدت حالي مشان اعرف السبب .. شبر شبر .. رمش رمش بلاش تكون في نتفة مسكارا بالغلط برضو ما فيه .. اتطلعت على اصابع رجليي و ايدي طلعو 10 و 10 و بدون مناكير .. عجزت صراحة .. حكيت يا خبر بفلوس كمان شوي ببلاش .. مشينا بهالطريق و ما حكى و لا كلمة .. دقرته امي بتقله شو اخبارك ؟ حكالها كنت منيح بس بعد ما شفت هالشوفة تنكدت .. خير .. يا خالتي الله يهديكي اذا انتي بتقبلي بنتك تطلع بهيك منظر انا ما بقبلها .. ليش شو مالها .. اتطلعي كيف جلبابها ديق .. مش عارف هو فستان سهرة و لا جلباب .. انا بس سمعت هالكلمة حكيت اااااه .. لو سمحت وقف شوي .. طبعا هو فهم عليي و وقف بدون نقاش .. نزلت و اجيت ارتكي عالسيارة زي المرة الماضية .. ما لحقت اسكر الباب الا حضرته ماشي و بدون ما يهتم .. اتصلت عليي خالتي بتقلي اوعي تركبي تكسي هلا ببعتلك امجد .. انا فكرت امي معنا و قلت بنزل يتاسفلي .. ابصر كيف يومها ما عيطت .. بجوز وصلت لدرجة التمسحة .. اجا امجد بعد ربع ساعة من وقفتي .. طلعت .. حسيت انه ما معه خبر باللي صار حكيت احسن .. انا كنت مقهورة كتير و حاطة راسي عالشباك و بتطلع .. سمعت صوته بحكيلي والله يا ياسمين ما تخيلت انه يطلع منك كل هالعمايل .. خير شو طلع مني .. بصراحة بصراحة كل العيلة انصدمت لما عرفت انك بتحكي مع واحد يعني معقول تصاحبي و انت بنت عالم و ناس و مربية و صاحبة دين ماشاءالله عليكي .. ضحكت من قلبي ، اجتني الفرصة لعندي و لازم استغلها .. ليش بتضحكي .. عليكم .. مالنا .. ما توقعت تصدقوا ، مدام عارفين اني مرباية و من هالحكي كيف بتصدقوا ؟ .. يعني الحكي مش مزبوط .. لأ طبعا .. بس انتو مين حكالكم .. مش مهم مين حكى المهم انها طلعت اشاعة الحمدلله .. و وصلنا بيت سيدي و كان الجو متوتر .. فهمت من امي انه سيدي زعل من احمد و بهدله كيف بترك بنت بالشارع .. و امي زعلانة منه و خالتي كمان مسمعته حكي .. حكتلهم انا مش زعلانة و صح كلامه هو نبهني اني ما انزل من السيارة قبل هالمرة و انا رجعت عدتها .. احمد بس شافني حكيت هيك تبسم و حس اني جد مهتمة فيه .. و مشاعري تجاهه عم تزيد يوم عن يوم .. يعني لو كان حيط كان من زمان حس بس هاد رجل ثلجي صعب يحس من اول مرة هههه .. *★يــــتــــــبــــــ؏★*